Una Limba.

Ariseu, mi seu biu cun fradili meu. Deu e fradili teneus unu liámu stranzu. Mamai nos tzerriat “i protosardi”, e casi mai manifestaus s’unu cun s’attru dengus, ma teneus d’ogna momentu sa tzertesa  de tenni stima s’unu de s’attru. Potzu nai chenza timore chi fradili meu est in su coru meu commenti unu fradi etotu.

D’ogna logu, ariseu femus setzius a pigai friscura a Lapola. A sa beritadi, ci fiant 7 gradus, unu bellu primunotte de ierru, de cussus chi ti ses cancarendi de su frius… ma ci fiant puru lantias a infrarosso (infrarrubiu?🙂 ), bona cumpangia e femus bufendi birra, e custu fiat de abbastu po chistionai in paghe.

Eus chistionau de tottu e de nudha. De sa famiglia pagu, de sa citadi meda. Tocca… eus crastulau puru.

E in mesu a totu, e prus che totu, emus chistionau de indipendentzia, de sarditade e de sa limba. AH! SA LIMBA! Chi est sa limba chentza nomene, sa limba e basta, e sa limba chi no tenet identidade, sa limba de totus e de nisciunu. Una limba chi est cumenti su sardu: balente e disuníu. Chi no seus prus bestendi sa berritta, e sas centu concas ant a fai puru calincuna cosa… foedhant centu limbas!

Ma deu pentzu chi certai de cali siat sa limba “bera” de Sardigna est cumenti certai de chini siat prus forti: Hulk o Sa Cosa. Una limba, cali chi siat, depit essi foedhada, depit essi scría. No importat mera de sa chistionai o scriri “bene”. Sa grammatica sighit s’usu, no est s’usu chi potet sighiri sa grammatica. Oe deu scriu una cosa chi – dhu sciu – est prena de irballus. Scriu una limba chi no est de custu o cudhu logu, ma tenet paraulas  isceberadas de d’ogna logu aundi d’apu intendias. No scriu Campidanesu, Mesania, Logudoresu o Laconesu. Scriu unu pagu de totus, poita seu cresciu unu pagu in cadaunu de custus logus. Sa limba mia est sa vida mia in custa terra.

Chistionaus in limba chentza timore. Scrieus in limba chentza timore. Dognunu faltat, dognunu incertat, totus impares imparaus, chenza bregungia. Oe deu nau una peraula irballada, cras dha apo a narai giusta. Ma si mi frimu a pentzai: “‘tta sutzedit si faltu?”, no dha apo a imparai mai. E custu balit po sa persona cumenti po sa natzioni.

Ajó, chistionaus imparis!

ANNOAMENTU: Mentras chi femu a sutta de sa docia, su cerbedhu meu at continuau a traballai. Femu pensendi… a infrarrubiu! Su sardu tenet, po disgratzia, stampus mannu de ditzionariu in calincunu campu. Meda genti at a narai chi “no si potet chistionai de scientzia in sardu”. BENI! No teneus unu problema, teneus una baga! Seus cumenti unu pintori innanti de una tela bianca: podeus criai.

Po bisura: in Sardigna no teneus “squirrels”. Podeus nai, chentza problema: “scoiattolu”, furendi sa peraula a s’Italianu. Ma podeus nai su propriu: “Ardillu” o “Ardigiu”… poitta no? Teneus una pariga de seculus de dominatzioni Aragonese, podeus pigai una peraula de su Castellanu (Ardilla). E, poitta no?, dhu podeus tzerriai “Topi de Matta”. Chentza furai peraulas a destra e a manca. Cummenti una kenning.

Itta est sa kenning? Una kenning est una locutzioni piessigna de sa poesia Norrena. Imbecis de usai una peraula, su poeta potiat usai una frasi pitica, meda bortas cun notas de sas legendas. Po bisura, s’oru fiat tzerriau “braxi de flumini”, poitta in sa leggenda de is Nibelungos, s’oro d’aiat acabau in su Renu, aundi si narat chi luxiat cumenti braxi asutta de s’abba. E no teneus nimancu de si dhu fai totus a sa matessi manera. Imoi podeus narai o scriri dognunu cumenti cheret e – ci potis contai – aus a cumprendi s’unu a s’attru su propriu.

Po tzerriai sa luxi invisibili podeus narai “infrarossu” e “ultraviolettu”… faendi unu scempiu de s’italianu e de sa limba sarda paris… o podeus narai “infrarrubiu” e “ultratanadu”. Poitta no? Chini cumprendit su Sardu d’at a cumprendi de seguru. Deu no chistionu su Tedescu. Ma si mi narant chi “arrubiu” est “rot” e “tanadu” est “violett”, candu biu “infrarot” e “ultraviolett” giai cumprendu itta mi funti narendi. E si unu cumprendit sa limba sarda, e scit itta sutzedit a sa luxi candu is ondas chi dha creant bandant a una lunghesa de unda prus pitica de 400 nm o prus manna de 750 nm (fintzas a 1 mm), no at a tennere problema a cumprendit de itta seus chistionendi.

Podeus criai peraulas in libertade, con unu pagu de fantasia… ma su sardu tenet duas cosas in su sambene: sa poesia e su bentu. Aundi est su problema?

2 commenti

Archiviato in Lifestyle, Sardinia

2 risposte a “Una Limba.

  1. E’ UN POST MERAVIGLIOSO! MERAVIGLIOSO! MERAVIGLIOSO!

Lascia un commento

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...